أخبار الطاقةأخبار عاجلة

عادل البهنساوى يكتب : يجعل بيت الصينيين عمار !!!!

عفوا ساخرج عن سياسة الموقع قليلا لاكتب هذا المقال من عقل مواطن فلاح يخاطب جيرانه فى الحقل عفوا 

مقال يكتبه عادل البهنساوى: 

عم الحاج جمال ابو عبدالرحيم والخال محمد ابو السيسى اظن انهم دلوقت مرتاحين البال … مرتاحين  ومبسوطين قوى قوى  وع الاخر  علشان الست جريد الصينية  اللى بتعمل مشروع الخطوط هتريح الكل من الحرج والكسوف وهختبر  عازل جديد وان شاء الله الرجالة اللى بعتهم العم جمال والخال محمد هيرجعوا كلتها كام يوم وان شاء الله يزفوا البشرى عشان  نبل ونشرب الشربات … اى والله عايزين نشرب الشربات يا جماعة اديلنا كام شهر فى نكد العازل فشل .. العازل سقط وجاب كحكة  .. لأ ما فشلش .. العازل مش عارف ايه بيعلقوه فى المشروع … وماله يا خويا يعلقوه ولو منجحش نشيله .. يا عم جمال انت بتهزر يا راجل تشيل  ايه بعد ما تعلق  هتشيل ايه والله يا حج جمال انت بتهزر صح .. صح يا عم جمال يا بلدياتى يا محترم والله انت محترم وانا بحبك.. بس قولى يا عم جمال لما العازل جاب كحكة فى المعمل بتاعهم بختبروه تانى ليه يا حج جمال ولا هو كتر فلوس ناس رايحة وناس جاية ويا دار مدخلك شر والنبى ترد عليا يا شيخ علشان عندى كرشة نفس 

ومش عارف مالك ومال الجماعة بتوع ايليجيكت وهيديلكو وكهروميكا والشركات المصرية الغلبانة اللى واقعة من سبعة الا تلت مالك يا حج جمال مستقصد الغلابة ليه يا راجل انت والخال محمد ابو السيسى الله يفتح عليه اللى عمره ما خد قرار فى مخالفة واحدة…. الراجل حنين يا جماعة وماله البابطين تاخد 16 مليون من صفقة فاشلة عادى  هيجرى ايه الابراج هتركب ولو اكلها الصدا نلحمها  يا جماعة متكبروش القصة دى علاقات عربية عربية  .. المحاسبات يقول انه فيه مخالفات فى التعاقد مع السويس للصلب حققوا يا جماعة ومحدش يحقق لان الحاج محمد عايز يحقق الاستقرار وماله يا خويا حقق الاستقرار براحتك بس دعوة اللى واقعين من سبعة اللى تلت هتجيبكم الارض باذن واحد احد  لانها دعوة مبروكة وربنا بيستجيب للغلابة المكسورين اللى ملهمش سند الا اللى خلقهم …

مبنى فى المنيا ما يساويش ميت الف  اقسم بالله لو ادهولى وادونى عليه فلوس ما يلزمنى ويصرفوا عليه 10.9 مليون دكر عادى هو الجنيه بقى له لازمة صح يا حج محمد وقال ايه بعد عم جمال ابو عبدالرحيم ما يبعت للنيابة بقدرة قادر رئيس المنطقة البشمهندس مسعود  يلم الجماعة ويقولهم لازم نروح نقعد فى المبنى دا حتى الهوا هناك يفتح النفس  ويرد الروح لانه جاى ومعاه كربونات الكالسيوم من المحجر اللى جنبه يعنى غذا اصلى والله الراجل عنده حق احنا محتاجين الكربونات تقضى ع الانيميا يا حج جمال والله انت صح وبعدين يبعتوا مكتب رئيس القطاع ويتسرق من اول يوم ويبعتوا مكتب تانى عادى يا اخونا الفلوس كتير ويجعله عامر يا حج جمال انت والخال محمد  

وبعدين يا اخوانا الحاج جمال ابو عبدالرحيم شايل شيلة ربنا يعلم بيها حرام والله الراجل بيقول عنده ناس مش ولابد فى المناطق يعنى هيعمل ايه .. ياك فى ايده عصا موسى .. هيعمل ايه الراجل هيجيب منين فلوس للشركات بتاع مصر  والست جريد الصينية جابت الهنا كله جابت سلفة م الصين سبعميت مليون دورر  مين كان يجيبها دى ” على فكرة مفيش ولا دورر وصل مصر يا حج جمال وواضح انك اخدت بمبة  ” والعيال اللى شغالين فيها زى العفاريت تلاقى الواحد من دول ينط ع السلك ولا على باله لكن احنا من كتر الفول اتهد حيلنا عندك حق يا حج جمال انت بختار الصح وسيبك م الكلام اللى ملوش لازمة 

الرئيس المحترم اللى انقذ البلد من الافاقين تجار الدين وانقذ البلد من الضلمة وشايل طين 40 سنة فاتوا وكل الشعب بيدعيله سيبك من المرتزقة والمغرضين اللى بيشتموه الرئيس ده اللى عمره ما هيكون موظف لامريكا ولا غيرها لما يصدر يا عم جمال قانون علشان يحمى الغلابة وشركات البلد والموظفين الغلابة اللى فيها  والشباب اللى عايز ياكل لقمة عيش بشرف والصناعة الوطنية اللى ما صدقنا فاقت وقامت لما يصدره المحترم وانت يا حج جمال ما تنفذش القانون ولا تعليمات الريس هتقول ايه عادى برضه …. لا ومليون لا مش عادى يا حج جمال لانك كده بتخالف قانون انت والخال اللى ماسك المالية … واوعى تقول اصله ما يمشيش على النقل يمشى ونص يمش واربع تنصاص يمشى مليون مرة واقرا القانون زين ولو مش عندك ابعتهوك عندى منه اربع نسخ خد واحدة واقراها ما يضرش  لكن مش عارف مالك برضه مستقصد الغلابة ليه … هه مستقصد الغلابة ليه يا راجل ارحم الناس مش لاقية المرتبات يا راجل مش كده مايصحش لا يجوز ما ينفعش والله عيب يا حاج جمال .. عيب كبير قوى انك تسيب الدنيا ظاطت وهاصت وباظت وكأنك رافع ايدك وبتدعى يخرب بيت الشركات المصرية ويجعله عامر يا صين … يا صين “

السابق

وزير الكهرباء يستقبل سفيرة مصر ببورندى لمناقشة احتياجات قطاع الطاقة

التالي

الملا فى قبرص اليوم لتعزيز التوجه لتحويل مصر لمركز اقليمى للطاقة فى المنطقة

admin

admin

لا توجد تعليقات

شارك برأيك

لن يتم نشر عنوان بريدك الإلكتروني. الحقول الإلزامية مشار إليها بـ *