عادل البهنساوى يوجه رسالته الثانية الى المهندس جمال عبدالرحيم : مدد يا عم جمال ..مدد

المهندس جمال عبدالرحيم رئيس الشركة المصرية لنقل الكهرباء

الرسالة الثانية يوجهها عادل البهنساوى رئيس تحرير الموقع الى السيد المهندس جمال عبدالرحيم والسيد المحاسب محمد السيسى بخفة دم العامية المصرية من مشاعر فلاح يخاطب جيرانه فى الغيط ولعل المهندس جمال عبدالرحيم الذى يلقى مكانة كبيرة من طاقم تحرير الموقع  باحترامه للرأى والرأى الاخر يدرك ما وراء الرسالة ..

“بصراحة قمر منور يا جماعة حج جمال ابو عبدالرحيم المحترم  ربنا يعمر بيته يارب ..خد بعضه وطار ع المصيف لا وايه الله يحرسه من العين لبس الشرت الاحمر والبنطلون الجينز والكاب  ربنا يحرسك م العين يا حج جمال كل اهل البلد  شافوا الصورة وكانوا مغشوشين فيك قام شيخ البلد قالهم هو بعينه الحج جمال ادعوله يا رجالة انه ييجى بالسلامة م المصيف

وكل اهل البلد  واقفين ع الترعة بالسروال ابو استك بيدعولك تيجى بالف سلامة يا كبير والخال محمد ابو السيسى  المحترم غلط وبعت صورة للموقع بس والله قمر فيها … والله يا خال محمد هيبتك كبيرة قوى واحنا محتاجين الهيبة دى واحنا متأسفين قوى يا جماعة اوعى تزعل يا حج جمال  احنا بنهزر وانت يا خال محمد اياك تكون زعلت من الكلام اللى فات  اللى مالوش اية لازمة

احنا بندرش يا اخوانا والله بندردش واحنا هنعرف احسن منكم  ما تيجى كل شركات الصين والدنيا كلتها  و الست جريد الصينية تشتغل وتركب ابراجها واسلاكها وعوازلها مش انت وافقت يا حج جمال .. وانت يا خالى محمد ابو السيسى مش انت وافقت خلاص طظ ف اتخن واحد يا رجالة بلا شركات محلية بلا دياولو يعنى احنا خدنا ايه منهم غير وجع الدماغ اعتصامات وزيادة مرتبات  دى شركات تسد النفس وتجيب الفقر لا بلاها واحنا هنلاقى الانفار  بتوع الست جريد  دول منين تلاقى الواحد منهم عايز ياكل البرج باسنانه ولا اللى راكب ع السلك زى الفراشة ولا كأنه راكب حمار ناس بتوع شغل يا رجالة هو احنا نفهم احسن منكم لا طبعا انتوا الكبار والا مالوش كبير يشتريله كبير  ..

وايه المشكلة لما العوازل دى تركب ما تركب العوازل ونكيد العوازل وفيها ايه لما العوازل اللى سقطت فى امتحان الدور الاول وبتعيد عشان الكحك اللى جابته فى الدور الاول دى بتحسن مجموع يا اخوانا ..   ما تركب وتتكسر ميت حتة  العشرة حلوة يا اخوانا والست جريد مشفناش منها غير الخير كله واحنا ناس عشريين ولما تتكسر العوازل هنشوف اللى بيتنططوا ع السلك تانى وهترجع ايام الست جريد الحلوة .. ايوة الجماعة الفلاحين كانوا قاعدين يبصوا على انفار الست جريد والحاجة مناجى العمشة تقول : يا حلاوة جيين منين دول يا ولاد والواد عيد النطع يقول للحاجة مناجى اسكتى يا حاجة اوعى تفتحى خشمك بكلمة لحسن يكهربوكى دول تبع الحج جمال ابو عبد الرحيم وجايين يركبوا القزك ده علشان ينوروا الحتة والله الحج جمال كله بركة مش هاين عليه يشوف اهل الحتة مضلمين هههههههه يا حاجة مناجى قال مضلميين قال

تقوم الحاجة مناجى تخرف وتقول للواد عيد  هو الحج جمال ده شيخ البلد يا واد يا عيد .. يقوم عيد النطع يقولها يا نهارك مش فايت اسكتى متعليش صوتك الجماعة الصينين بيعرفوا عربى ويروحوا يقولوله الحج جمال العمدة وكبير البلد كلها يا مناجى العمشة يومك مش بايله نهار  … ههههه   هههههه الخال محمد ابو السيسى قال الجماعة بتوع الست جريد روحوا ركبوا العوازل بتاعتكم وملكوش دعوة انا قلت تركب يعنى تركب ويمين تلاتة لتركب  .. طبعا يا خالى محمد هو حد يقدر يكسرلك كلمة طالما قلت تركب يعنى تركب وكلامك هو الصح يا خالى محمد يا بتاع المالية يا عثل … يا عثل انت يا اللى مالى مكانك

ولا يحد يجرؤ يا خالى محمد يقولك تلت التلاتة كام حلو بصحيح قال يعنى الطور اللى بيسأل مش عارف تلت التلاتة كام وبعدين يا خال محمد يعنى تعبك يروح هدر انت والحج احمد ابو حنفى الراجل الطيب المحترم اللى متسمعش صوته من ادبه  مش ممكن هى الدنيا جرى ايه فيها يا ولاد محدش يفتكر ان الحج محمد ابو السيسى والحج احمد ابو حنفى خدوا بعضيهم وراحو الصين اتفقوا مع الست جريد على المشروع وعلى كل حاجة

هو حد يقدر ينسى يا حج محمد اللى عملتوه عشان البلد محدش يقدر ينسى الا البعدا اللى بيكرهوكوا ودول يتعدوا ع الصوابع  اما انت يا عم الحج جمال ابو عبدالرحيم ان شاء الله انوى بس نروح انا وانت المولد اللى فى  الزقازيق وسيبك من اللت والعجن دول ناس فاضية وغاويين كلام وانت مش فاضى يا حج جمال .. ومدد يا عم جمال مدد هههههه “